嗚嗚……唉唉!這款代誌安哉講?啥人講得明白?悠悠四十年陰陽兩茫茫，血水早枯枯骨已爛。加唔過，阮萬千慘死冤死个人無一甘願轉世投胎；唔係罪孽深重不得超生，係阮个冤魂怨魄不安不散，閻羅王也無法度。天地間原係一平衡法場，親像汪汪大湖海洋，佗位凹落無平，水就湧流佗位；必欲填滿填平，湖海閣再安定平靜。那無安平个湖水、海潮就排山倒海大地震動，人畜湮滅日月無光；不平哪。彼無安靜个冤魂恨魄，化作暴雨狂風，化作惡疫凶瘟，凶兆籠囚人間，國族危亡旦夕。民國三十六年二月底慘案，壓覇覇个搶掠，暴慘慘个屠殺；血流成河堆屍如山；河水染紅青山赤赭。安尼 代誌，那係輕輕采采了去，講啥位「向前看，m免往後 」?彼个時陣「前頭」係烏堪堪青冷冷，哪有啥位路途可行咧?「後頭」个冤魂走到「前頭」來，有啥味好看咧?

嗚……嗚嗚……事實汝敢知?銃仔貫胸，永遠永遠苦痛；「八番」鐵線穿掌一串串投丟入海，海底永遠永遠不得平靜；活活生埋，填泥氣絕，永遠永遠地下不得寧安；割耳朵鼻孔，切嘴唇剁鳥鳥，永遠永遠三魂七魄著驚無法凝聚上路。細漢仔，老阿婆，翁仔某，父子檔，手足夥─係阮，者係阮哪!係阮一家人一群人哪!慘慘慘慘絕絕絕!敢係一句「向前看」就了得个?唉呀!

嗚嗚!阮愛哭!阮就係愛哭，哭伊四十年四百年，哭到地裂天崩，哭到凶徒惡霸湮滅灰飛，哭到四海平地安天晴!嗚嗚……阿母喔!蒼天阿!者敢係地球人間咧?嗚……看者網，目眶紅，破甲 者 大孔；想要 補，沒 半項，誰人 知阮 苦痛。今日那將者 來放，係永 遠無希 望，為著 前途 鑽 活縫，找 傢俬 補 破網。 手接網，頭就重，悽慘 阮 一人。意中 人 走叼藏，怎無 來鬥 相工。孤不二 哀罔 震動，夯鋼 針接 西 東，天河用線 做 橋板，全 精神 補破網……嗚嗚!蒼天阿!阿母喔……