曾貴海

日時頭，毋想開花

也沒必要開分人看

臨暗，日落後山

夜色跈山風湧來

夜合

佇客家人屋家庭院

惦惦打開自家个體香

福佬人沒愛夜合

嫌伊半夜正開鬼花魂

暗微濛个田舍路上

包著面个婦人家

偷摘幾蕊夜合歸屋家

勞碌命个客家婦人家

老婢命个客家婦人家

沒閒到半夜

正分老公鼻到香

半夜

老公捏散花瓣

放滿妻仔圓身

花香體香分毋清

屋內屋背

夜合

花蕊全開

一九九八、五、十母親節

日時頭：白天　　跈：跟隨　　惦惦：靜靜　　圓身：身體