曾貴海

熱天當晝

日頭煮熟六根庄

會動个東西全部避起來

狗仔哈呀哈

目珠失神看著人

大人睡當晝

細人仔偷偷去泅水

跋上橋中間

直直插入水底

炸開水花泥漿

一年二年三年到六年生

每一年級都有代表來

大家浮上沒下分人尋

有時節，走去淺水道

打波波戽水相拚

水花飛射滿面

熱烈个南方日頭

照亮童年黑金个圓身

搞懶了，大喊一聲走去瓜園

偷採香瓜分人捉

有時節去青仔田

一步一步惦惦聽聲捉烏龍仔

帶去伯公樹下相鬥

庄尾伯公廟

有一頭百年老榕樹

樹影圍成一隻大遮仔

涼風對南邊海吹過來

大人睡到流口瀾

細人仔圍共下鬥烏龍仔

精靈个青絲仔

跳上跌落喙樹子

樹枝上个蟬仔愈唱愈爽快

秋天一到，伊等就會變燥壳

歸只暑假

毋使上課寫字讀書

田坵河壩伯公榕樹

就係我等个教室先生

教到我等畢業變大人

當晝＝＝中午　　目珠＝＝睛睛　　細人仔：小孩　　圓身：身體　　

分人：給人　　青仔：二期稻作中間田所種矮莖植物　　惦惦：靜靜　　

有一頭：有一棵　　遮仔：傘　　口瀾：唾液　　共下：一起　　

歸只暑假：整個暑假