曾貴海

一條幾億噸个水龍

日日夜夜

想要衝下來吞殺歸庄人

半夜醒來

會聽到河壩叫泣个悲聲

電鋸會鋸盡山頂个樹林

變做一棟一棟高級洋樓

山靈會走避深山

綠色个靚山會失去青春个光彩

田坵會變做大路屋仔

農民會穿上西裝

毋識麼介煙草禾仔

街上沒人想講客話

親切个鄉音

只有對老夥房傳出來

鄉親會賣田賣地

客家人會變成人客

食飽後就要惦惦離開

祖先个靈魂

會託夢安慰子孫

講這就係客家人命運个原罪

鍾理和會還魂

倚佇笠山頂

寫下生前沒完成个

笠山悲歌

假使美濃會起水庫

留下來个客家人

只好準備放火燒天