看汝，汝看
年深外境猶吾境
日久他鄉即故鄉
──打鐵庄黃家先祖峭公
一八九五年四月底
台灣變天
日本人要來管台灣人了
歸庄个人氣悶悶
看汝，汝看
看老嫩大細
再看看屋家田園
二百零年客家移民奮鬥个財產生命
會毋會一夜之間沒了
歸庄人愁得菜飯食無落
有兜人攬著子女暗暗叫泣
到底要怎般正好
一八九五年
李鴻章佇日本馬關用一隻筆刀
將台灣割送日本
台灣人同清朝官員成立台灣民主國
國旗有隻露牙个老虎騰雲駕霧
五月底日本近衛師團登陸三貂角
一禮拜就攻佔台北城
唐景崧同丘逢甲挾著屎窟走避中國
北台灣淪陷
劉永福帶著黑旗軍苦守南台灣
要戰或者要投降
要逃難或者要死守
命運行到生死線
沒人敢作主
三山國山廟个王爺阿公起乩
指示庄民打開四大柵門
擎白旗个迎接日本軍
六月十七日，日本人佇台北舉行始政式
近衛師團九月中旬編組南進軍
上萬陸軍同三十二隻船艦
十月十一日大早八點零登陸枋寮
經過三十零年个明治維新
日本已經是一個現代化強權
南進軍團長乃木希典名將
帶著日俄戰爭時勇猛个日本東北軍
攻打只有舊大砲老槍大刀个義勇軍
有人講義軍个抵抗像拿肉包打老虎
毋聽王爺阿公个指示
六堆各庄頭馬上組織抗日聯軍
下六根个壯丁圍佇副大總理蕭光明屋家參詳
大家一心一意決定戰到一兵一卒
當時个下六根庄有東西南北四個柵門
柵門下有圳溝當做護庄河
外圍再包著一層一層个齧竹
日出柵門，耕田坵
夜入柵門，保子孫
二百年來像軍營保護歸庄人
沒論伊姓林陳李賴蕭羅張曾楊廖鄭
有錢有勢个蕭家佇廟前起了一只大屋
大屋左邊有間步月樓
兵逢甲同劉永福曾經上樓飲酒賞月
沒想到變做日後保庄个堡壘
全庄壯丁加上劉永福義軍總共千過人
用舊大砲守著四邊柵門
日軍經過下埔頭，下埔頭人避入六根庄
日軍行過水田墓地埋伏佇步月樓附近
反抗軍佇朝晨十點零向日軍開出第一槍
一場大戰就在東柵門个步月樓開火
婦人家同後生條全部出來「滛」手
步月樓一直沒分日軍攻陷
日軍沒法度等到半夜再打
入夜後，日軍轉攻南柵
放火燒稈棚攻開南柵門
一只小庄仔同日軍對戰十四點鐘
戰到第二日清早二點正失守
義勇軍一共死傷百過人
日軍戰死十五人受傷五十六人
蕭光明第二个孻仔月祥戰死東柵門牆頭
三子月祥大腿重傷，不久死了
守西柵門个壯士用石頭塞入大砲做彈藥
開砲倒打自己人
歸庄人用生命拚到底
講好愛來个六堆援軍全沒看到人影
日本人入庄時節
西邊阿菊妹揹著細孩仔
聽人講拿毯仔掩頭腦子彈打不入
差一些分日本人打死
步月樓戰後，隔避庄林邊東港人出面講和
日本人強迫蕭光明離開家鄉去梅縣
日軍同義軍使毋得互相報復
下六根庄避開滅庄个命運
但是日軍捉到十過儕義軍
捆著圓身佇王爺壇前
當大眾面前斬頭
伊等个血對廟埕慢慢个流
流過泥路流入西邊圳溝
以後，王爺阿公生日
使毋得做布袋戲
王爺阿公毋想看到
布袋戲台上人頭落地个戲情
就像當初抗日義軍斬頭个悲情
註：下六根：現今屏東縣佳冬鄉�g佳冬六根兩村。