曾貴海

跈著河壩溝背行到底

歸座庄仔分竹頭樹包起來

就係外阿婆屋家溝背庄

四邊全係青綠色田坵

大家人講盡靚个客話

還小去外阿婆屋家

每日邀朋友灌土狗仔

鉤仔抓羊尾仔草蟋仔

有時節去河壩泅水

搞到肚饑正愐到歸外阿婆屋家

暗晡頭，食飽飯後

老嫩大細擠來禾埕

該時節還沒電火

油燈火像火焰虫眨呀眨

四邊暗嗦嗦

大大細細打嘴鼓劃虎講故

細人仔聽到入耳

有一擺叔公講伊看到無面鬼

分鬼對田坵趜到屋門口

細小仔嚇到攬共下

枷著別人个手

歸屋家个路上緊看後背腳悸顫

有時節，半夜醒來

屋背巒屻崗�g竹頭樹枝吱吱呱呱

夜鳥叫到恁悲傷

驚到起雞皮

只有攬著隔壁个外阿婆

詐沒聽到睡到天光

註：溝背庄就係屏東縣竹田鄉履豐村。

跈＝＝跟　　盡靚＝＝真漂亮　　土狗仔＝＝大蟋蟀　

仔＝＝青蛙。羊尾仔＝＝蜻蜓　　草蟋仔＝＝黑色蟋蟀　

愐到＝＝想到　 火焰虫＝＝螢火虫 暗嗦嗦＝非常暗　

畫虎　＝＝吹牛　　細人＝＝小孩　　趜＝＝趕　　

攬共下＝＝抱在一起　　恁＝＝那麼　　詐＝＝假裝。