曾貴海

霧氣个白絲帶纏著屻崗

一條彩虹

過幾粒山

佇雨簾中

向東打開一扇天門

中央山脈最靚个小老妹

留戀美濃毋想走个小老妹

雨水洗淨伊个笑容

歸粒山閃爍綠色光彩

八色鳥同黃色揚葉仔

避入母樹林

惦惦聽天公落水

大雨打濕田地

中圳湖半睡半醒聽雨中个渡子歌

孤單个煙樓附近

幾儕農民佇遠方个田坵

彎腰跪落禾行間

行入雨中个美濃山谷

伸手迎接个綠色山脈

用阿姆慈祥个目光

看護子女歸家鄉

大雨過後个小鎮天空

鍾理和毋熄滅个文學光輝

寫在彩虹色帶頂上

……行上行下

……毋當美濃山下