三歲左右
大人牽我去看海
沙岸上个熱氣
像白色蛇哥搖來搖去
第一擺看到海
驚走一下
那有恁大个東西
看得到个全部就係海
透到遠遠个天邊
圓身一滾
幾萬條白浪湧過來
中學時代，寒暑假一到
半夜常常聽到海湧聲
想到了，就騎自轉車去看海
海像知己个朋友對我講沒停
有時節，脫去衫褲
分海浪沖流
臨暗時節
落日照射大海
雲彩搖動灣波
一條橘紅色个光輝大路
對海岸筆直攤到天頂上
暗到看毋到人个時節
海也濛濛霧霧
漁火佇海面眨呀眨
我就惦惦離開
戀愛个年紀
轉熟仔生滿面
星仔對天頂浮出來
雲白个月公像大拜箕掛佇海角
月光花開滿海面同木麻黃樹林
歸暗晡，海吻著海
我攬著伊腰身
金色漁火搖亂我倆儕个心
中年後
久久歸去故鄉坐佇海
海沒再對我講麼介
自自然然大聲小聲唱起來
像和尚个木魚聲
單純个生命歌聲
海唱我也唱
蛇哥＝＝蛇 第一擺＝＝第一次 恁＝＝那麼 轉熟仔＝＝青春豆
暗晡頭＝＝晚上。細妹仔＝＝女孩子
海 ＝＝海邊。月公＝＝月亮
倆儕＝＝倆人